Jeugherinnering (1954/55)
Ich herinner mich nog dat wie ich bie de grootste kleutesj zout, bie zuster José moosj kómme, ómdat ich op de sjpaorbrök haw gesjpeeld.Sjtein en cente oppe rails lègke, die es de trein koum, in sjtökker sjprónge of gans plat woorte. De straof: eine gansen daag bie de allerkleinste kleutesj zitte! Dat deig pien, want de waek d’rop zou ich nao de ‘grote sjool’ gaon!
In ’t Lömmericherveldj hawwe veer wie bekans jederein ’n paar hounder en knien. Ich verzörgde die beeste, gouf nuuj sjtreu en vouwer. Emes haw mich vertèld dat sjtreu zo goud zou brenne! Ich vónj in de biekeuke ein deuske zjwaegele en opèns sjtóng ’t sjtelke mit knien en hounder in brandj!
Bäökenteare leip ich hèl weg. Veur mien gevuil leip ich oere door de getskes van ’t Lömmericherveldj. Wie ich eindelik poem thoeskoum, bleek mer eine knien get mitgekrege te höbbe: mien witje waar get broener gewore!
=====================================================
oet leifde veur ’t zuje
kómme en gaon
ze koume oet ’t zuje, van sjpanje en italië
mit ’n sjerp kontrak en gans väöl heimwee
‘t aete waar ónbekènd en sjmaakde ouch neit
baeter in ’t gezèllehoes... trök nao ’t zuje...
noe gaon véér mit ’t vleigtuug
nao dat zuje, nao dae sjone mediterranee
geneite van pasta en paella en
van de kleure en geure van ’t zuje...
toon oet zitterd vertrók oet ‘t zuje,
jus wie chantal en huub, die twee oet tegele,
ze woorte bekènd in bènne- en boetelandj
mer koume trök, al waar ’t veur aeve,
vanwaege de leifde veur ’t zuje...
laot ós allenej blieve sjrieve euver ‘t zuje
in ós sjoon, zuvere modesjtaal
euver ós werm, poëtische provins,
oet leifde veur ’t zuje,
oet leifde veur ’t platbook...
juli 2021© john
============================================================
helde
ich wunsjde mich dat ich koosj sjrieve
euver leifde, van leid en gelök
mer ich bèn geine Hendrik* of Menno*
‘t zal ummer perbeiere blieve...
ich wunsjde mich dat ich koosj teikene
euver leifde, van leid en gelök
mer ich bèn geine Vincent* of Pablo*
op mich houf geer neit te raekene...
ich wunsjde mich dat ich koosj zènge
euver leifde, van leid en gelök
mer ich bèn geine Charles* of Caruso*
zo wied zal ich ‘t noots brènge...
ich wunsjde mich dat ich koosj dichte
euver leifde, van leid en gelök
mer ich bèn geine Hendrik* of Guido*
wach dus op baeter gesjichte...
151021©john
*Hendrik van Veldeke/*Menno ter Braak/
*Vincent van Gogh/*Pablo Picasso/
*Ray Charles/ *Enrico Caruso/
*Hendrik Marsman/*Guido Gezelle
========================================================
ónrös
richtig floep dae höb ich neit
toch bèn ich dèks óngerös
omdat ich weit, in dezen tied,
haet jederein zien eige sjtress.
waal of gein blaw-witte maskes
’t is vraoge nao bekènde waeg
jedes maol weier nuje regels
en vrieheid is nog wied eweg.
nondejuu, wo blif die sjpuit noe
‘t doert toch langer es gedach
gans väöl luuj mit zjwaore moud
die höbbe al zo lang gewach.
op vakans mit bös of vleigtuug
gans wied weg nao zee en zón
mit de tent of mit de sjleiphut
wit geer nog wie dat doe góng?
dat dènke aan die vruiger tieje
geuf mich dèks ein goud gevuil
bèn dan weg van leid en elenj
dat wurt ouch mich waal ‘ns teväöl
laot veer haope dat al gans vlot
alles wurt wie veur twee jaor
dat veer helop zègke, sjreve:
v’r zeen mit dae corona klaor!
john hertogh (zittesj@ziggo.nl)
kèns te dat?
höbs te
dat ouch waal 's,
daste nao weurd mós zuike
en wits gaaroets neit mee wie 't geit,
dan begins te meistens gans hel te vlouke.
de weurd zeen opèns en euveral kwiet.
dat gevuil dat alle weurd opnuuts
gebaore mótte waere,
kèns te dat?
johnhertogh ©2013
Maak jouw eigen website met JouwWeb