Jeug-herinnering
Dörf
Dae daag moosj mien jóngste zösterke veur ’t eers nao de bewaarsjool!
En ich moosj ‘m es awdste mitnumme. Klein hendsje in mien handj.
Ich bleef mer nao zien gezichske kieke, wól gèn traone zeen, mien hert brook.
Die traone kwame toch mer ich moosj ‘m achterlaote bie de zuster óm zelf op tied inne grote sjool d’rnaeve te zeen.
Ónger sjpeeltied leep ich mit ein ónröstig hert róndj. Wie zoow ’t mit ós Truusje zeen? Koosj ich toch ins effe kieke!
Noe vanne sjpeelplaats aaf , de sjtraot op loupe, det waar wie doodzunj.
Mer ich moosj! Ich moosj! En ’t lökde sjtiekem nao de sjpeelplaats d’rnaeve te loupe.
Ich zoog de zuster wie ein moderkloek loupe tösje de sjpelende bewaarsjool-kinger. En ich zoog ouch mien zösterke, gèn traone!
Mit ein vlinderlich maedsjeshert sjlaop ich truuk.
Noe dink ich nag dök: det ich, bangesjieter, det toen gedörf höb!
toos schoenmakers-visschers
===========================================================-
jannewarie-dip
jannewarie knotert
is neët kóntent
de zón noe ouch
coronapatiënt?
alles vaal en gries
nieks blie’s ingelies
pratsj, sjliek en toter
richtig jannewarie-geknoter
ofwen alles op de bón
…toch lichskes aan de horizon
qua gemood inne pöt
mer de kanarie flöt
wat meer es troos?
sjtrakkes “moeremoos”
toos
=======================================================
det gans greun klèdsje
sjerpe sjerve
van gemis
zjwumme in ouge
groot van angs.
de nach kwiet,
de daag zeukend,
gevange
in ein woekerend web,
waem – wo – waoróm,
mer och,
kóm eff zitte
en vertèl mich get,
euver gister?
weit ich neet.
morge?
weit ich neet.
euver vreuger dan!
det greun klèdsje,
wit g’r nag?
ach jao
ich weit ’t weer,
det gans greun zomerkleid
en dae greune hood,
’t sjting mich zo good!
toos
===============================================================
wat ein gedoons
klink neet al te positief
mer dit gegaeve
is geweun ’t laeve
jank d’r óm
lach d’r mit
wat ein gedoons
’t laeve vól mit shit
en…sjoons
toos
Maak jouw eigen website met JouwWeb